Luk 14 | BOJ | STEP | Yori bati bei qa Yesus a Farisi gate bei aqa talq gilsiqa a ombla iŋgi uyeb. Naŋgi iŋgi uyeqnabqa tamo qudei tal dia soqneb qaji naŋgi Yesus koqyoqneb. A anjam bei grotimqa minjqajqa deqa koqyoqneb.

Luke 14

Yesus na tamo bei aqa jejamu suŋyeleŋej qaji di boletej

1 Yori bati bei qa Yesus a Farisi gate bei aqa talq gilsiqa a ombla iŋgi uyeb. Naŋgi iŋgi uyeqnabqa tamo qudei tal dia soqneb qaji naŋgi Yesus koqyoqneb. A anjam bei grotimqa minjqajqa deqa koqyoqneb. 2 Ariya tamo bei jejamu suŋyeleŋej qaji a Yesus aqa areq di awesoqnej. 3 Deqa Yesus na tamo di unsiqa dal anjam qalie tamo naŋgi ti Farisi naŋgi ti endegsi nenemnjrej, “Niŋgi mariye. Yori bati qa tamo boletqajqa di kere kio? Dal anjam a kiersi marqo?” 4 Onaqa naŋgi na kamba anjam bei Yesus minjosai. Naŋgi kirieleŋesoqneb. Deqa Yesus na tamo di aqa jejamu ojsiqa aqa ma boletej. Osiq qariŋyonaqa aqa segi qureq aiej. 5 Onaqa Yesus na Farisi naŋgi olo nenemnjrej, “Nuŋgo aŋgro kio nuŋgo bulmakau kio yori bati qa uloŋosim subq aiimqa niŋgi na aqaryaiyosib subq dena osib goge atqab kio sai kio? Niŋgi na merbiye.” 6 Onaqa naŋgi na kamba olo anjam bei Yesus minjqa yonab keresaiinjrej.

Niŋgi na nuŋgo segi ŋam soqtaib

7 Bati deqa Yesus a na tamo qudei naŋgi unjrej, naŋgi tamo ñam ti naŋgo awo jaramq dia awoosib iŋgi uyoqneb. Deqa a na naŋgi yawo anjam endegsi minjrej, 8 “Tamo bei na maruro atsim ni metmimqa ni gilsim tamo ñam ti naŋgo awo jaramq di namo awoaim. Ni tamo ñam ti naŋgo awo jaramq di awoqam di goio lanja na tamo ñam ti bei metim bam ni mermqas, ‘Ni awo jaram di uratosim tamo ñam ti yim awoqas.’ Yim ni jemaimim gilsim tamo laŋaj naŋgo awo jaramq di awoqam. 10 Deqa tamo bei na maruro atsim metmimqa ni gilsim tamo laŋaj naŋgo awo jaramq di awo. Yimqa goio lanja na bosim mermqas, ‘O was, ni bosim tamo ñam ti naŋgo awo jaramq endi awo.’ Yim tamo kalil iŋgi uyeqnub qaji naŋgo ŋamdamuq dia ni ñam koba oqam. 11 Tamo naŋgi naŋgo segi ñam soqteqnub qaji naŋgo ñam Qotei na aguq atqas. Ariya tamo naŋgi naŋgo segi ñam soqtosaieqnub qaji Qotei na ñam kobaquja enjrqas.”

Niŋgi na tamo qudei niŋgi kamba iŋgi eŋgwa keresai qaji naŋgi di gereinjroqniye

12 Yesus na anjam degsi minjrsiqa goio lanja di minjej, “Ni maruro atsimqa ino segi was naŋgi ti ino segi leŋ naŋgi ti tamo ñoro koba ejunub qaji naŋgi ti metnjraim. Ni degyqam di naŋgi na kamba maruro atsib ni metmib gilim iŋgi anaimqab. 13 Deqa ni maruro atsimqa tamo ñoro saiqoji unub qaji naŋgi ti tamo jejamu lainjro qaji naŋgi ti tamo siŋga uge naŋgi ti tamo ŋam qandimo naŋgi ti metnjrim bab iŋgi anainjre. 14 Amqa ni tulaŋ areboleboleimqas. Di kiyaqa? Naŋgi na kamba ni iŋgi anaimqa keresai. Deqa mondoŋ tamo uŋgasari kumbra bole bole yeqnub qaji naŋgi subq na tigelo batiamqa Qotei na kamba awai tulaŋ boledamu ni emqas.”

Tamo bei a maruro atej. Yesus a deqa yawo anjam marej

15 Yesus a anjam degsi marnaqa tamo bei Yesus ombla awoosib iŋgi uyoqneb qaji a anjam di qusiqa minjej, “Mondoŋ Qotei na aqa segi tamo uŋgasari naŋgi taqatnjrsim naŋgo Mandor Koba sosimqa a na naŋgi iŋgi anainjrim awoosib koba na iŋgi uyqab. Deqa naŋgi tulaŋ areboleboleinjrim sqab.” 16 Onaqa Yesus na kamba yawo anjam bei endegsi minjej, “Tamo bei a maruro atqa osiqa tamo gargekoba naŋgi endegsi minjrej, ‘E maruro atqai. Ijo maruro aqa bati brantimqa e na niŋgi metŋgitqa bosib ijo maruro uniye.’ 17 Onaqa aqa maruro bati brantonaqa aqa kaŋgal tamo bei qariŋyonaq gilsiqa tamo naŋgi di metnjrej, ‘Niŋgi boiye. Iŋgi iŋgi kalil gereiysib atonub unu.’ 18 Degsi metnjrnaqa naŋgi kalil bqa urateb. Naŋgi segi segi utru kiyaqa bqa urateb di minjoqneb. Bei na minjej, ‘E mandam bunuj awaiyonum. Di unqajqa aiqai. Deqa ni goio lanja minje, “E bqa keresai.” ’ 19 Bei na minjej, ‘E bulmakau bunuj 10-pela awaiyem. Deqa bini e na naŋgi wau enjritqa wauqab. Di unjrqajqa aiqai. Deqa ni goio lanja minje, “E bqa keresai.” ’ 20 Bei na minjej, ‘E bini uŋa bunuj onum. Deqa e dego bqa keresai.’

21 “Naŋgi degsi marnabqa kaŋgal tamo a olo puluosiq gilsiq anjam kalil naŋgi na minjeb qaji di goio lanja minjnaqa a minjiŋ oqetonaqa olo qariŋyosiqa minjej, ‘Ni urur aisimqa gam kokbaq dia gam kiñilalaq dia tamo iŋgi iŋgi saiqoji unub qaji naŋgi ti tamo jejamu lainjro qaji naŋgi ti tamo ŋam qandimnjro qaji naŋgi ti tamo siŋga ugeinjro qaji naŋgi ti kalil joqsimqa ijo talq beleŋoiye.’ 22 Onaqa kaŋgal tamo a olo aisiqa tamo naŋgi di kalil joqsi bosiqa aqa tamo koba minjej, ‘O Tamo Koba, e ino anjam dauryosim agi naŋgi kalil joqsi bonum. Ariya ino tal tamo na maqosaiunu.’

23 “Onaqa goio lanja na olo aqa kaŋgal tamo qariŋyosiqa minjej, ‘Ni aisim gam kalilq dena ti nañuq dena ti tamo naŋgi joqsim au. Naŋgi kalil babqa ijo tal magwas. 24 Ariya tamo naŋgi bqa uratonub qaji naŋgi ijo maruro unqasai.’”

Tamo bei a Yesus dauryqa marsimqa a mati geregere are qalsim Yesus dauryem

25 Yesus a yawo anjam degsi marsiqa tigelosiq walwelej. A walwelosi gileqnaqa tamo uŋgasari tulaŋ gargekoba naŋgi dego a dauryosib giloqneb. Deqa a bulosiqa naŋgi endegsi minjrej, 26 “Tamo bei a e daurbqa osimqa aqa abu, aqa ai, aqa ŋauŋ, aqa aŋgro naŋgi, aqa was naŋgi, aqa jaja naŋgi ti, aqa segi jejamu dego jeutnjrqasai di a ijo aŋgro sqa keresai. 27 Tamo bei na aqa segi ŋamburbas qoboiyosim e daurbqasai di a ijo aŋgro sqa keresai.”

28 Osiqa naŋgi endegsi minjrej, “Tamo bei a tal atqa osimqa a mati awoosim tal kobotqajqa aqa awai geregere are qalsim aqa silali sisiyqas. Aqa silali kereqas kio sai kio degsi are qalqas. 29 Ariya a mati degsi are qalqasai di a tal aqa utru atsim bati amble di aqa silali saiamqa tal kobotqa keresaiiyimqa tamo qudei naŋgi unsib a kikiyosib minjqab, ‘Ni tal aqa utru atem di ni kobotqa keresai.’ Yim a jemaiyqas.

31 “Mandor koba bei na mandor koba bei qoto itqa marsimqa a mati awoosim geregere endegsi are qalqas, ‘Ijo qaja tamo 10 tausen naŋgi na mandor di aqa qaja tamo 20 tausen naŋgi ñumsib winjrqa kere kio?’ 32 A degsi are qalsim marqas, ‘E na mandor di qoto buŋyqa keresaiibqas.’ Degsi marsimqa aqa wau tamo qudei naŋgi qariŋnjrim gilsib mandor di minjqab, ‘Uŋgum, iga qotqa uratonum.’

33 “Dego kere tamo bei na e daurbqa osimqa a mati aqa segi iŋgi iŋgi kalil uratosim di a e daurbqa kere. Aqa iŋgi iŋgi kalil uratqasai di a ijo aŋgro sqa keresai.”

Bar qa yawo anjam

34 Osiqa olo marej, “Bar a bole. Iŋgiq di bar atoqnib aqa uyo boledamuqas. Ariya bar aqa qajarara koboqas di iŋgi kie na olo qajararatqas? Di keresai. 35 Bar aqa qajarara koboqas di a ugeqas. Iga bar di osim mandam ti bulyonamqa mandam namuryqa keresai. Deqa iga bar di uratosim waiyqom. Tamo a dabkala ti sqas di a ijo anjam endi geregere quem.”